Pantun Padang

PANTUN PADANG

Oleh  Zainir, S. Pd, M. Pd.

SAIRIANG BALAM JO BARABAH,

 BALAM LALU BARABAH MANDI.

SAIRIANG SALAM JO SAMBAH,

SALAM LALU SAMBAH KEMBALI.

ANTAH SAPEK ANTAH CUBADAK

RAMO RAMO DI DALAM GANTANG

ANTAH DAPEK ANTAH KA INDAK

KAJI LAH LAMO NDAK DIULANG

TAMBILANG DIRUMPUN LANSEK

TASISIAK DIRUANG LANTAI

DEN BILANG SADO NAN DAPEK

NAN TINGGA UNTUK URANG NAN PANDAI

PARIAMAN TADANGA LANGANG

BATABUIK MANGKONYO RAMI

DI RANTAU SANAK TADANGA SANANG

BAO TUMPANG BADAN KAMI.

LAYANG LAYANG BATALI BANANG

DIAMBIAK KATALI TIMBO

LAH HEBOH URANG DI PADANG

SI BUJANG KAWIN JO JANDO.

SIANA DUDUAK MARENDO

MARENDO DI HARI SANJO

DIMA INDAK KAJATUAH CINTO

GOREANG CIEK NYO BAGIN DUO.

BABUAI MARI BABUAI

BABUAI PICING KAN MATO

KOK DAPEK KATO SASUAI

BAJADI BULAN DIMUKO

KABUKUIK BATANAM PADI

DITANAM ANAK JUNJUNGAN

LAH MALANG NASIB DEN KINI

LAH TAGAK TIANG GANTUNGAN

RUMPUIK SARUIK PANJANG MANJALO

PANEK PANDAN MALADUNGKAN

SAKIK HIDUIK SANANG KA BILAO

PANEK BADAN MANANGGUANG KAN.

LAH MASAK NASI RANG KAPAU

CUBADAK JO GULAI TUNJANG

TADANGAN ANAK MAIMBAU

OI ABAK CAPEKLAH PULANG

SINANGIH LAUK RANG TIKU

DIATUA JO TALI PANDAN

MANAGIH ANAK DIPINTU

MALIEK ANAK BAJALAN

PINCALANG BIDUAK RANG TIKU

BISA BALAIA MANILUNGKUIK

BASILANG KAYU DALAM TUNGKU

DISINAN API MANGKONYO IDUIK

KOPI PAIK SANDARAN GULO

GULO DATANG DARI BATAWI

HATI HATI SANAK MANJAGO

JIKO ANGUIH SANAK KARUGI

TARANG BULAN TARANG CUACO

ANAK GAGAK BALARI LARI

JIKO ADIAK KURANG PICAYO

AMBIAK PISAU BUNUHLAH DIRI

ANGKU AJI BABAJU JUBAH

KARIMBO MAMIKEK BALAM

DIADIK SAYANG LAH SUDAH

DI AMBO RASO MANDALAM.

DITARAH INDAH TATARAH

DIPAPEH JUO KAJADINYO

DITAGAH INDAH TATAGAH

DILAPEH JUO KAJADINYO

DITINGKEK ANAU DI RIMBO

JATAUAH BADARAI SILARONYO

INDAK SAKETEK ATIKO IBO

JATUAH BADARAI AIA MATO

DIDULANG SADULANG LAI

PANDULANG AMEH DI BANGKO

DIULANG SAULANG LAI

PAULANG NAN TINGGA CAKO.

SITUJUAH BANDANYO DALAM

BAKAMBUIK PINANG MUDINYO

BAMULO KASIAH MANDALAM

DEK GAYUANG SUDUIK MATONYO

BADABUA OMBAK SAILAN

TIBO DI TAPI MAMACAH KARANG

TAMANUANG DI TAPI JALAN

KAMANO  RANTAU NAN KA DI JALANG

SIMPANG AMPEK SUKO MANATI

PANDANG TUJUAH MATO PINAGAN

DISINAN DULU ADIAK BAJANJI

BAJALAN LURUIH BAKATO BANA

SIMPANG TIGO BAKABUN LAWEH

INDAK PUEH MATO MAMANDANG

ATI NAN OROK  AROK CAMEH

RASO KALAPEH KATANGAN URANG

BINTANG BANYAK DI  BULAN  TARANG

BAA DEK BUMI KOK KALAM JUO

USAH DI AROK BUJANG KA PULANG

BUJANG BAJALAN JO ATI IBO

NAN LAH GUGUA BUNGO DITANGKAI

RIBUIK MANGGUNCANG BATANG CIMPAGO

NAN DI RANTAU BUJANG MARASAI

JANJI DI KAMPUNG LAH MUKIA PULO

LAH KACAU IKAN DI DALAM AIA

DEK LAH KARUAH  AIA DILUBUAK

DI RANTAU LAPEH DI KAMPUNG MUKIA

TANDO KAJADI BUJANG LAPUAK

DEK TAJAM CAHAYO MATOARI

AIA DILUBUK ALAH TAKUCAK

KOK JAUH BUJANG DARI NAGARI

JANJI DI KAMPUANGUSAH DI URAK

KALAU LAH RUSAK KASIK DI PULAU

BIDUAK NAN INDAK KASINGGAH LAI

KOK KANAI JEREK BUJANG DIRANTAU

URANG DIKAMPUNG DISESO JANJI

APO KATENGGANG BIDUAK KETEK

KAPA LAH BANYAK KAMANGANTIKAN

ULAH DEK BUJANG PULANG TALAMBEK

BANGKALAI URANG NAN MANYUDAHKAN

SALIDO JO BUNGO PASANG

DIDAKI BUKIK NAMPAK PAINAN

AROK KA DATANG KAPA GADANG

BIDUAK KETEK BA ABAIKAN

KA TOKO BALILAH BAJU

DAPEK MAREKAN TIGO ETO

AROK KADANG DATANG BIDUAK BARU

BABUANG SAMAPAN NAN LAMO

SAUH PUTUIH PELANG LAH LAPEH

LAPEH KA PULAU DUA TIGO

KAIA PUTUIH IKAN LAH LAPEH

BADANG BACAMIN AIA SAJO

AMBIAK GUTIANG POTONG KARATEH

BULIAH DI RAMBAH RIMBO GADANG

KAIA PUTUIH IKAN LAH LAPEH

BADAN LAH PENEK DEK BARANANG

ILIA BANDA MUDIAK BANDA
BATUGKEK BATANG TIMARAU
NAN INDAK DIDANGA KINI LAH DIDANGA
KONCEK MAALIAH TUNGGAK SURAU